政情：麥美娟寧做醜人治曳曳女
部分港孩嘅形成同其父母太過溺愛有關，立法會議員麥美娟（Alice）雖然仍未結婚，但已經好識教小朋友，亦唔怕做醜人，對姪女同契女都夠惡，一旦做錯事就一定會鬧！
Alice話，姪女依家未滿兩歲，已經「曳到飛起」，會捉住人哋隻手去打人，但係Alice嘅爸爸又好縱姪女，唔畀人鬧佢。Alice為咗教好姪女，要扮演壞人嘅角色，即使要做醜人都在所不惜。
唔笑畀人感覺好惡
另一方面，Alice嘅契女平時都唔係好乖，試過考試成績一般，就算畀媽媽鬧都完全唔怕，相反契女就怕畀Alice鬧，仲會即刻嚇到喊，睇嚟Alice真係有「嚴母」風範。Alice強調，自己教小朋友時先會惡，又話以前唔少人同佢反映，如果唔笑就會皺起眉頭，畀人感覺好惡。因此，Alice成日都提醒自己要笑，以免惹人誤會喎。