中環出更：前廣播處長呻忙 未睇過港台新聞
香港電台啱啱接收亞視兩條模擬廣播頻道，並喺數碼地面電視頻道同模擬電視頻道廣播，當中會有自家製作嘅視像新聞時段。曾任廣播處長嘅海關關長鄧忍光，尋日早上到立法會出席會議時，坦言自己工作好忙，仍未收睇過港台嘅視像新聞節目。唔通不在其位就對港台節目都無晒興趣？
寧跑步 唔吼新時事節目
鄧忍光話，佢每日早上六時就起床，但早上通常會跑步，加上近排工作忙碌，即使港台早上有每天新製作嘅時事節目，亦仍未有收睇，如果有時間一定會收睇，亦對港台節目有信心，因為節目一向有口碑咁話喎。
鄧忍光履新廣播處長當日，已經被下屬以黑衫黑地氈恭候，其後任期內亦同港台內部唔咬弦，多次被質疑唔熟悉傳媒運作，又經歷過「空櫈」風波，唔知係咪因而心灰意冷，所以依家唔想再睇港台，怕憶起昔日嘅慘痛經歷呢？
卓妮