中環出更：生仔定生女 蔡加敏有表查
早前十五個商會青年團體舉行香港青年工商界聯歡晚宴，一大班來自不同商會同社團嘅成員難得聚埋一齊，不約而同講吓湊仔經，甚至講吓生仔生女秘方。有兩子一女嘅「玩具大王」蔡志明千金蔡加敏都有現身，佢話當年無特別去留意有乜生仔秘方，認為都係順其自然好啲，但就透露曾經睇過有朋友傳來嘅一張「清宮生男生女表」，究竟有咩啟示呢？
「清宮生男生女表」係根據女士農曆年齡同懷孕日期，再對照知道生仔定生女。蔡加敏見張表咁有趣，梗係貪得意睇吓啦，即管對吓套用喺自己身上準唔準，點知又真係準喎。不過，究竟係咁啱撞中咗，定係真係咁準確，佢就唔清楚喇！不過，孕婦依家想知道生仔定生女，都可以照超聲波，加埋呢個表，唔知能否增加準確度呢？
黃楚恒求子靠甜蜜
同樣多仔多女嘅中華總商會會董黃楚恒同香港青年聯會副主席蔡德昇，企埋一齊好啱傾，事關兩人除咗同樣叫Stanley外，亦是名副其實嘅「多仔公」，黃楚恒家有五個小朋友，蔡德昇亦有三個子女。蔡德昇笑言，曾經真係試過向黃楚恒請教生仔秘訣，點知黃楚恒只係答佢兩個字，就係「甜蜜」喇。
由於黃楚恒家族經營中成藥生意，蔡德昇就話，下次想生仔時行經佢哋舖頭，可以順便問吓有冇「甜蜜」呢隻秘方賣喎！佢又話，小朋友大得好快，近日佢抱囡囡返學時，已經開始被囡囡嫌棄，話會畀同學仔笑，所以要好好珍惜與小朋友相處嘅時間。
卓妮