政情：趙振國撐余鵬春選立會
早前一個鐘錶界人士雲集嘅活動上，盛傳有意角逐立法會批發及零售界議席嘅「假髮大王」趙振國同裕華國貨董事總經理余鵬春（PC）不約而同現身。距離九月立法會選舉唔夠半年，睇嚟兩人都好勤力為呢場選戰熱身。
政壇流傳PC可能喺批發及零售界或香港總商會立法會代表兩個功能界別中二揀一，但早前總商會主席彭耀佳表態支持現任立法會代表林健鋒連任，唔知係咪因此令PC嘅計劃有變，於是專心挑戰批發及零售界呢？不過，PC對此笑而不答。
挑戰批發及零售界議席
講開又講，聽聞趙振國一心與批發及零售界現任議員方剛對決，但係自知勝算不大，所以若被睇高一線嘅PC出戰，趙振國就唔會參選，改為全力支持PC。難得見到兩人同場，卓妮梗要趁機問吓趙振國會唔會支持PC選批發及零售界啦，點知佢好爽快話支持喎！