民望一向低殘嘅教育局局長吳得掂，如今又添多了不少個諢號，像「吳不忿」、「吳順氣」，而更厲害的是──惹火尤物；據悉，有教育團體唔多敢請吳順氣局長做嘉賓，免得到時又遇到示威，甚至要出動警方協助才能離開，搞到吳不忿又要仰天長嘯：欲加之罪，何患無辭！如此悲壯場合，可一不可再！
有論者為吳得掂算舊帳──因應學生自殺潮，佢煞有介事於網誌向家長發出呼籲：「放下我們的手機，認認真真與他們溝通。」誰不知面對學生要求對話、親手接封請願書，佢就睬你都有味，一於不落車，「大丈夫話唔落就唔落」，翹起二郎腿，在車內玩足四十五分鐘手機！
吳得掂玩手機早有前科，佢早年在立法會議事堂瀏覽股票，在官場掀起一股購買防窺屏幕貼的熱潮；加上今次「欲加之罪」事件，有添馬艦中的花生友就話啦：吳克儉是「放下手機」嘅最佳反面教材。毛澤東當年話：「手中有糧，心裏不慌」；去到吳順氣嗰度，變成「手中有機，心裏不慌」；看來，吳得掂還算是「毛澤東的好學生」，懂得「活學活用毛澤東戰無不勝」嘅思想！
之不過，任內一事無成，加上眾叛親離，如今又變「惹火尤物」，生人勿近，睇怕連出席學界嘉賓嘅場合都會減少，佢大把理由，唔需要「克儉」，多啲外遊出去賞紅葉睇櫻花啦！
老朽奉勸佢唔好郁吓發老脾，一時不忿，一時唔順氣；「厚黑學」一代宗師李宗吾話齋：「喜怒哀樂皆不發謂之厚，發而無顧忌謂之黑！至厚黑，天地畏焉，鬼神懼焉！」
吳得掂呢個教育局局長上任以嚟，都已經夠晒惹火㗎啦，何必再鬼神懼焉，神枱上貓屎，把自己變成一個怪物，咁搞法，歷史將宣判你有罪！