政情：南亞兵禍港 葉劉做埋CY份工

CY無辦法 葉劉提良策

葉劉前日建議港府修例重建禁閉式難民營，令假難民無法外出工作或作惡亂港，降低佢哋來港嘅誘因及減少對治安影響。她又建議向中央政府求助，租借深圳偏僻島嶼興建難民營。葉劉嘅提議獲不同黨派支持，有議員認為政府應喺外地加強宣傳，令假難民來港後不能自由當黑工。CY尋日出席行政會議前表示，難民問題對香港造成極大困擾，亦對政府部門造成相當大嘅行政負擔，政府會從治安同外交方面處理，希望尋求短期見效嘅方法解決問題。對於喺外島搵地方興建難民營，他就指政府不想等太長時間。

有分析指出，葉劉最近先提出興建難民營建議，係因為眼見政府喺假難民問題上束手無策，由於佢本身並非特首，過早提出可能會予人太招搖嘅感覺，故以半個政府中人的角色提出解決方法。葉劉嘅建議引起討論，但CY卻嫌時間長，意指「遠水不能救近火」，但CY又未能提出其他有效嘅方法。其實葉劉絞盡腦汁希望解決「難」題，愛港精神可以話係毋庸置疑，加上依家有心有力，真係隨時可做埋CY份工。

隨時變「梁出去 葉劉入」

早年北京流傳一個政治笑話，內容係前國家主席江澤民走進位於天安門廣場嘅毛澤東紀念館，請示躺在透明玻璃棺材中嘅前中共領導人毛澤東：「我該怎麼辦？」毛澤東坐起身回答：「你進來，我出去！」呢個政治笑話不禁令人聯想起葉劉同CY，唔知會唔會有日真係喺香港發生呢？