政情:愛車名人 雲集馬場

沙田馬場尋日有名車品牌舉行香港打吡大賽,唔少愛車名人均盛裝出席支持。卓妮見到馬會主席葉錫安,講起揸車,唔知佢做車主嘅年資耐啲定做馬主年資比較耐呢?佢就話梗係車主喎!不過,中華廠商聯合會副會長史立德嘅仔女史佩加同史昊洺就非常幸福,事關佢哋年紀輕輕就已經做馬主先過做車主喇!

出席活動嘉賓眾多,包括愛沙尼亞共和國駐港名譽領事林建康及太太林黃寧艷、霍麗萍與丈夫John、律師會前會長王桂壎與太太Angela等。講起做馬主,史佩加話最初只係爸爸加埋佢個名落去,一家人齊撐愛駒,而佢都係近年先做車主,考咗車牌後都係揸緊部老爺車喎!卓能集團非執董趙式浩就話自己平日最常駕駛嘅係日本車,因為佢哋做工程不時要落地盤,所以最緊要實用,唔驚刮花同整污糟。

林黃寧艷當年喺英國讀書一夠年齡已經考咗車牌,事關佢全家人都覺得駕駛係好基本嘅技能,一定要學識,但依家有兩個小朋友之後就好少再自己揸車喇。

劉家輝嘆難提升業績

至於寶馬香港區董事總經理劉家輝,就笑笑口話自己做車主就可以,但做馬主就要儲多啲錢同學習多啲有關知識先得,仲話市道低迷,好難提升業績,反而係要保持良好服務質素,唔畀客人流失之餘,要令佢哋更加印象深刻。

除咗駕車觀賞香港景色外,霍麗萍就選擇拍攝欣賞香港,佢話早幾年除咗有影低家族大宅面貌,仲有拍攝本港各區風景,但佢慨嘆依家好多地方已經唔同晒喇。

第一手消息請下載on.cc東網iPhone/iPad/Android/Windows Phone Apps

卓妮