政情:鬍鬚曾「喜」用歌贈慶

網上經常都有二次創作,但被人批評無尊重原創者版權。財政司司長曾俊華(鬍鬚曾)尋日出席一個電視業活動,被問及會贈送一首咩歌畀創意工業,鬍鬚曾就回應話會送歌星徐小鳳(小鳳姐)嘅《喜氣洋洋》,話因為呢首歌已被二次創作七、八次喎。不過,網民改編《喜氣洋洋》,好多時都冇問過小鳳姐或取得歌曲版權人嘅同意,鬍鬚曾送呢首歌畀創意工業,會否是對業界一種諷刺呢?

鬍鬚曾在財政預算案中引用台灣歌手蘇芮歌曲《憑着愛》,但當日記者會上,有記者就將芮(讀音「銳」)讀成丙,佢話其實當時反應「想笑囉」,但事實上當時又留意唔到佢想笑喎,難怪活動主持都話佢掩飾得幾好。

稱市民未察預算案創意

鬍鬚曾又話,其實今年預算案好有創意,只係市民唔為意。其實由頭睇到尾,再由尾睇番上頭,都睇唔出邊忽有創意,估唔到鬍鬚曾連創意都掩飾得咁好!

第一手消息請下載on.cc東網iPhone/iPad/Android/Windows Phone Apps