政情:小學留過班 莊偉茵感恩

民生書院九十周年校慶,專程邀請校友同師弟妹傳授領導之道。中電企業發展總裁莊偉茵(Quince)首次公開學生照,力證自己由幼稚園已經同書院結下不解緣。今次返回母校演講勾起咗Quince唔少回憶,佢自爆小學成績一般,考過全班尾二,更試過英文同數學唔合格而留班!不過,佢笑稱因年尾出世先會係咁,仲話留班一年後再無問題嘞。

老公係同班同學

Quince連學校制度都記得,抱怨副科唔合格要犧牲暑假補課,但佢就話畢業後睇法唔同咗,仲感恩書院喺八十年代已經聘請來自北京嘅老師教普通話,令到佢嘅普通話起步比其他人早添!原來佢同丈夫黃楚權係同班同學,大仔Julian都喺書院讀過三年,難怪一齊出席撐場喇。Quince最後仲寄語學生要心存感恩,更即場多謝丈夫為照顧兩個兒子而裸辭,令佢可以安心發展事業。

第一手消息請下載on.cc東網iPhone/iPad/Android/Windows Phone Apps