上東網睇新聞，見到「四日三學生自殺」，除了感到哀傷，更詰問：「不是說讀書改變命運嗎？」何以家陣讀書變成攞人命？不是說「書中自有千鐘粟」嗎？何以讀書竟令咁多青少年「無法成人」，提早夭折？
四日三宗學生自殺，三名自殺者有二十歲的女大學生、中四學生及一名十二歲男生，都是「早晨八、九點鐘的太陽」，卻因為不堪考試壓力、熱愛田徑不愛讀書或疑因成績欠佳而輕生！據統計，本學年開學至今近半年，已接連發生七宗大學生自殺慘劇，合共有近二十宗學生自殺，究竟香港的教育制度發生咗乜事？唔該吳得掂局長認真要好好研究吓，人命關天，局長唔好求求其其、是是但但噏幾句行貨說話就交差好嗎？
吳得掂局長應該深入研究吓各大中小學校，對生命教育是否重視，有冇適當的支援輔助了解學生嘅情緒、困擾？大多數學校嘅所謂「危機小組」是否擺喺度做門面工夫？有乜真正幫到學生？教育局有冇真正巡校加強呢方面嘅宣傳？學校與家庭有乜可行嘅互通機制，去關心小朋友及青少年嘅身心成長，同佢哋坦誠溝通，正確面對逆境嘅態度？
事實上，香港教育欠缺對特殊學生的照顧與培養，已是不爭嘅事實，今次悲劇的主角之一周宇恒，據悉是田徑健將而不愛讀書，若然香港有足夠的體藝學院，而學校老師又能發掘其天賦，使他在這方面盡展所長，老朽相信這會改變佢一生而不會搞出「無法成人」的悲劇！
再講，香港嘅「融洽教育」根本搵學校老師及家長笨，一班唔同天賦、學習能力有明顯差異嘅學生困埋一齊，美其名「融洽教育」，阿哥，如果教得好，學習得到成果，呢個世界就冇所謂邏輯矣！
吳得掂局長，唔該少睇幾本雜誌，去少次日本賞花，認真諗諗如何救救孩子吧！