政情：八網難逃：訪硅谷議員「偕」愛虛擬眼鏡
四名立法會議員單仲偕、莫乃光、郭家麒及鍾國斌（Felix）跳出香港玩到樂而忘返！單仲偕、Felix等四人趁立法會最近無大會舉行，約埋一齊去美國硅谷嘅科技公司，試玩最新開發嘅虛擬眼鏡，其中單仲偕話，該虛擬眼鏡於年底才公開發售，自己一度同Felix鬥放煙花，形容像真度超高，而且呢副眼鏡吸引力驚人，連新加坡總理李顯龍都試過玩到唔捨得走。
單仲偕續指，佢哋今次行程好緊湊，一日內去齊Uber、Facebook同Google三間公司參觀，之後又會視察電動車廠，參考吓佢哋嘅自動駕駛程式，據知眾人今次參觀科技公司只係美國之行嘅前菜，戲肉係隨立法會考察三藩市嘅美食車，佢哋依家已玩到咁興高采烈，唔知仲有冇精力參加正經考察行程呢？
（互聯網）