政情：新西情意結「俊」擊老鴿
尋日我哋先寫完，民主黨（白鴿黨）可能會派出元朗區議員鄺俊宇或南區區議員區諾軒其中一隻「乳鴿」，接替決定退休嘅「老鴿」何俊仁，喺九月立法會選舉出戰「超級議席」。不過，鄺俊宇尋日同傳媒飯局時，就強調自已始終出身於元朗，對新界西有份「情意結」喎。
若然鄺俊宇最後真係決定爭取循新西直選出線，喺黨內遲咗報名參選嘅區諾軒，就有望喺無競爭對手下「遲來先上岸」，但同樣爭取循新西出選嘅「中鴿」尹兆堅及「老鴿」陳樹英，今次就有排愁喇！
網上知名度勝前輩
無論係論資排輩或黨內支持度，尹兆堅同陳樹英都絕對勝過鄺俊宇，但去年嘅區議會選舉同剛結束嘅立法會新界東補選結果顯示，香港啲選民係貪新忘舊嘅。再加上鄺俊宇本身係知名網上愛情小說家，其專頁有成十幾萬人畀like，同時係少數唔會畀激進網民攻擊嘅白鴿黨員。喺政壇新時代下，鄺俊宇隨時可以擊敗黨內嘅「中老鴿」。