政情：揀立會主席 諗「定」一石二鳥
距離九月立法會換屆選舉不足半年，泛民建制黨派嘅布陣陸續浮上水面，但於立法會地位超然嘅立法會主席花落誰家，至今仍然莫衷一是，政圈盛傳熱門人選係民建聯譚耀宗（譚Sir）、新民黨葉劉淑儀及工業界梁君彥「三揀一」，幾乎篤定再做多四年嘅進出口界議員黃定光（象哥）忽然大打開口牌，提議一改不成文規定，由直選議員改為來自功能界別議員任立法會主席，莫非象哥有意一石二鳥，包括為一向被批認受性較低嘅功能界別同事出番啖氣？
還記得去年底區議會選舉一役，及上月底立法會新界東補選結果，都反映新舊交替嘅趨勢不可逆轉，其中象哥所屬嘅民建聯，統稱黨內「五老」嘅譚Sir、現任立法會主席曾鈺成等人，其中四人如無意外會退下火線，唯獨係象哥四年又四年，繼續冧莊嘅機會甚濃，預料最少會做足十六年，佢尋日同傳媒聚會時，一方面提議由功能界別議員接任立法會主席，另一方面力挽譚Sir留任做建制派召集人。
可修例杜絕拉布
政圈分析指，曾鈺成於今年九月退任立法會主席已成定局，雖則主席位置吃力不討好，但仍然有唔少人渴望更上一層樓，今次象哥忽然提議由功能界別議員接棒任主席，有分析指目標係令建制派有機會同時取得地區直選及功能界別嘅過半數控制權。
事實上，議員議案如要通過，必須得到功能界別、地區直選分組點票通過，建制派如要同時取得分組過半數控制權要先過兩關，第一關係地區直選由目前十七席，最少進帳一席至十八席，第二關才是落實象哥倡議由功能界別議員任主席，確保可以把分組過半數優勢體現於投票結果之上，提出修改《議事規則》等招數杜絕拉布。
然而象哥此言一出又引起外界無限聯想，先別說外界或認為由向來直選議員，改由功能界別議員任主席，於認受性方面係走政治回頭路，再者象哥本身都係來自功能界別，莫非佢心郁郁想「升呢」，但政圈相信呢個機會甚微，事關象哥過去經常被發現開會瞌眼瞓，相信佢都有自知之明，唔會偏向虎山行。
邊境購物城多波折
另外，象哥有份牽頭嘅邊境購物城計劃再出現波折，據知邊境購物城原定今年農曆新年開張，後來延至五月一日，最新進度係再延遲至七月一日前至有望開幕。象哥話，項目仍然等緊屋宇署等政府部門的批文，但招租情況反應熱烈，早前有村民向高等法院提司法覆核嘅風波亦已解決，希望今次唔好再延期喇。