中環出更：疑台上閉目養神 「曉」得解畫
尋日係一年一度嘅三‧八婦女節，好多團體都會舉辦活動支持婦女撐起半邊天，而民政事務局副局長許曉暉（Florence）單係尋日就要出席六場同婦女節有關嘅慶祝活動，期間於下午出席第二場活動時，坐在台上嘅Florence一度垂低頭疑閉目養神，Florence事後否認，話當時剛好低頭整理身上嘅衣服喎。
稱為整理衣服
話說尖沙咀街坊福利會松柏鄰舍活動中心尋日下午舉辦九龍區烹飪大賽，特首夫人梁唐青儀、Florence等應邀為嘉賓，並於台上並排而座，期間Florence一度垂低頭疑閉目養神，當梁唐青儀致詞時，Florence就全神貫注聆聽。當問及係咪於台上閉目養神，Florence解釋，當時剛好低頭向下望，整理身上嘅衣服，
Florence於致詞時提及，依家現代婦女既要照顧家庭，又要兼顧自己工作，少啲精力都難以應付，幸好其小朋友己經考完試，唔需要佢操心，如要數到工作最忙碌嘅時間，佢透露最高紀錄係一日連走十一場活動，所以於每個地方停留一陣就要去下一個活動。
卓妮