中環出更：職場叻女「葆」持健康心態
婦女事務委員會尋日喺政府總部舉行酒會，慶祝三‧八國際婦女節，多名政商界傑出女性均有出席，卓妮當然亦有到場。卓妮發現唔少職場叻女，唔單止工作出色，仲係外貌與智慧並重，好似東區區議員李進秋及有「哈佛小甜甜」之稱嘅前港姐兼南區區議員任葆琳咁。講到女性一忙就好易捱到殘，佢哋就認為心態最重要，個人開唔開心，好影響外表。
任葆琳笑言，依家好多女士都要兼顧家庭與事業，但佢就淨係嫁咗畀「香港仔」，全副心機擺晒落去個區度。佢又話，區內啲小朋友好鍾意同佢影相，滿足咗佢做媽媽嘅欲望，都好開心。
陳曦齡被嫌揸車慢
身為媽媽嘅李進秋及百仁基金副主席羅詠詩就話，無論幾忙都好，自己都一定要瞓夠八個鐘，咁先可以保持皮膚靚靚。羅詠詩仲話，喺香港嚟講，女性地位已經比其他地方好好多，而佢自己初出茅廬時喺銀行工作，上司多為外國人，對男女都算平等看待。
同場仲有港鐵主席馬時亨、灣仔區區議員伍婉婷、香港吸煙與健康委員會前主席劉文文、香港分享聯合創辦人陳淑芝、維特健靈董事長陳曦齡等。陳曦齡話，女士同男士喺工作上嘅強項弱項有別，例如男士喺體力上有優勢，女士有男士四分三或一半體力已經好好，但女士做錯嘢時，相對較易獲得寬容對待。佢又自爆揸車技術始終冇男性咁好，雖然夠安全，但好多人都嫌佢太慢喎。
劉文文、身兼吸煙與健康委員會副主席嘅伍婉婷，以及該會總幹事黎慧賢，三人聚埋一齊，一定係講吸煙。劉文文指出，近年多咗事業女性，因為工作壓力及社交需要而吸煙，而女性與男性煙民嘅分別係，大多數男煙民都好理性，見啲煙貴咗就會食少啲，但係女煙民就唔點著重價錢，因此就更加難令佢哋戒煙。
卓妮