綠色先鋒：普查港生態麻雀出沒注意

說起觀鳥，大多數人第一時間想起要「山長水遠」走入米埔或濕地公園，但其實只要細心留意，即使身處於石屎森林或工廠區，觀鳥都可以好簡單。麻雀（學名樹麻雀）是香港最常見的鳥類品種之一，但港人對牠們的認識未必多，香港觀鳥會將舉辦第一屆全港麻雀普查日，帶參加者留意市區出沒的麻雀，親身參與科學性研究，加深對城市生態的認識。

香港觀鳥會將舉辦第一屆全港麻雀普查日。

「某啲地區減少得好快」

「平時見到麻雀，大部分人唔會特別留意，因為真係太過common（普通），但其實喺某啲地區佢哋減少得好快，已經所餘無幾。」在香港的麻雀看似數目眾多，往往受忽視，但牠們的生存環境卻正受迫害，香港觀鳥會項目主任Jessica及Karly表示，麻雀的蹤迹原本遍布廣東及江西等地區，惟內地近幾十年來流行「食野味」的風氣，令麻雀的數量大減，內地部分省份甚至將麻雀列為受保護鳥類，直至近年內地立法禁食，才有生存轉機。

麻雀的適應力很強，無論郊外或城市環境，牠們都能生存及繁殖，而且喜愛親近人類及民居，給人的印象就如街坊鄰里。惟近年一些現代化的大廈設計卻令牠們「無碇企」，Jessica說：「喺城市生活嘅麻雀以往多數喺啲冷氣機隙縫位築巢，但依家愈來愈多大廈用落地玻璃，佢哋無地方住，惟有飛走。」香港觀鳥會計劃透過每年一度的麻雀普查，了解本地麻雀的數量有否突然大量減少或增多，從而了解城市發展會否影響生態平衡。