立法會區議會（一）功能界別議席（區一）向來是建制派囊中物，更被民建聯（民記）視為「黨產」，甚至在黨內落實「真普選」，首設黨內遴選機制，現有四人報名爭奪。不過，民記眾多第二、三梯隊早已等到頸都長，據知有個別參選人為爭取黨友支持，表明一旦當選，無論如何最多只做兩屆就會交棒，料其他參選人都要跟規矩辦事。
早前我哋報道過，民記有意就區一議席「抄橋」，學工聯會規定黨員只可以出任勞工界議席一屆，之後要轉戰直選嘅制度，但民記中人分析指，立法會新丁只做四年，隨時未搵到個人定位就要放生大海自生自滅，轉戰直選隨時送死，認為做夠兩屆可以累積知名度，轉場後可以讓路予黨內兄弟再爬山，據知黨內已經達成共識，未正式表態嘅參選人當選後亦要跟規矩。
不過，區一議席工作有幾多、發揮有幾大，真係有辦你睇，現任議員葉國謙做過咩相信無乜人知，所以四年鋪路轉直選都話唔夠時間，真係得啖笑，後生嘅第二、三梯隊都話最少做兩屆共八年，難怪老一輩做極都唔肯退喇！
適逢九月立法會選舉民記有「四老」退下火線，有黨友甚至建議新制度將來可擴大至所有直選議席，八年後要不按政治旋轉門加入政府，要不就退居幕後培訓政治人才。不過，眼前陳克勤已經做夠八年，黃定光更加邁向十六年都未言退，呢個烏托邦恐怕只係第二梯隊一廂情願，否則唔會傳陳曼琪退黨係為咗求出路喇。