中環出更：Ann姐話康署場地唱歌冇侵權
隨着《二○一四年版權（修訂）條例草案》第二度胎死腹中，立法會拉布戰亦暫時告一段落，但議員蔣麗芸（阿Ann）繼日前拍片唱改詞版《憑著愛》鬧爆拉布嘅泛民議員後，仍然關注版權法，尋日再上載新一集《Ann姐話你知》，話畀街坊知就算到康文署場地唱歌，都唔使擔心侵犯版權，原來政府一早已畀咗版權費。
「歌照唱 舞照跳」
阿Ann尋日上載短片，話有街坊向佢反映，擔心喺社區會堂舉辦活動時唱歌會觸犯版權條例，佢就話早前已經去信康文署查詢。
署方回覆指，政府早已向香港作曲家及作詞家協會（CASH）、香港音像版權有限公司（PPSEAL）及香港音像聯盟（HKRIA）簽訂協議，並每年支付版權費，保障市民喺康文署轄下演藝場地及多用途活動室，以至部分公園露天劇場及社區會堂唱歌嘅權利。
阿Ann仲喺片尾仲叫大家可以繼續「歌照唱，舞照跳」添！
其實都真係要多謝阿Ann嘅資訊提供，咁特首梁振英（CY）下次想唱《喜歡你》，移師到康文署場地唱就可以慳番六百元曲詞版權費喇！
卓妮