中環出更：「燊」手爸爸 生仔有心得
香港工業總會青年委員會一眾成員早前趁新春佳節歡聚，坐埋一枱竟然傾起湊仔經，事關當中唔少成員都係最近成為新手父母，好似委員陳雪兒個小朋友就剛剛出世五個月，而主席劉燊濤（Gary）去年就一索得男，一班青委仲大談生仔及生女分別有咩秘訣，Gary透露真係有親身試過唔同方法，聽聞食得牛肉多，生仔機會都大啲。
講到生仔秘訣，Gary開玩笑話父親劉展灝係生產力促進局主席兼有兩個仔，梗係要向父親請教吓，而佢得出結論就係要養精蓄銳，千祈唔可以話好想生小朋友就操之過急，密密「造人」係冇用嘅，情緒要慢慢培養出嚟，相隔幾日可能反而更事半功倍。佢仲話聽聞食得牛肉多，生仔的機會大啲，而食菜同食雞肉多就多數生女，咁啱佢好鍾意食牛肉，雖然唔知呢個方法係咪真確，反正佢覺得一試又無妨，結果真係一擊即中，生咗個仔非常開心。
劉子芸：仔女都心足
同場仲有副主席陳允誠、姚冠康、名譽會長孫榮聰、委員劉子芸及鄭凱茵等。聽完Gary分享嘅方法之後，陳允誠諗起當年佢聽聞嘅係啱啱相反，話食牛肉會生女，食雞同菜先係生仔，究竟係佢聽錯定啲人亂噏？難怪佢當年食牛多，但就生咗兩個仔，但佢話笑吓就算，因為生仔生女都一樣咁愛錫喎。
有個乖女嘅姚冠康亦相當認同，覺得生小朋友順其自然最好，如果連生小朋友都要按照人的旨意就會很悲哀。至於有對孖生小朋友的劉子芸就話，部分中藥食療對生仔生女都有幫助，但佢自己就冇特別偏好仔定女，因為有小朋友就已經好幸福喇！
卓妮