中環出更：「俊」取新投資 賺錢防老
香港人愈嚟愈長壽，若六十歲退休，分分鐘仲有二、三十年日子要過，所以講起退休問題都幾令人徬徨。菁英會早前舉辦「從青年角度看退休保障」論壇，香港中華總商會會董張俊勇（Thomas）自爆家族有好多超過一百歲嘅人瑞，包括佢嘅太嫲同阿爺。Thomas話，港人平均壽命好長，所以大家更加要認真計劃將來的生活。
Thomas話，現時香港的人瑞多達三千幾人，佢都好難估計自己幾多歲退休，亦好難話儲夠幾多錢先至可以退休慢慢搣，所以最好就係不斷物色新嘅投資項目，確保老咗都有穩定收入咁話。
孫榮聰搵唔夠冇得退休
同場嘅香港工業總會青年委員會名譽會長孫榮聰（Eric）及菁英會成員李曠怡（Jason），都有九十多歲嘅祖父母。
Jason話，現時祖母雖然已經九十多歲，但依然日日都返工，每朝都堅持打畀客戶保持聯繫，所以佢作為後輩都唔敢諗退休喎！至於Eric就指，啲人成日都話「搵夠就退休」，但錢係唔會搵夠嘅，笑言即係唔使退休囉！
菁英會主席盧金榮就認為，想享受退休生活，除咗要儲夠金錢之外，更加要趁後生投資喺健康方面。事關醫療方面的費用係大部分長者最大的開支，如果身體唔好到時負擔就會更大，所以佢依家都相當注重飲食，應酬都盡量少飲酒。佢仲話，有工作寄託會令人健康同長壽啲，所以佢希望年老時除咗繼續工作之外，仲可以做吓義工幫助其他有需要嘅長者。