中環出更：「汶」「鋒」色變 學民再現分裂
學民思潮（學民）自四年前反國教一役發圍，佔領行動之後更加同學聯平分秋色。不過，外表風光的背後就多次面對骨幹成員退出問題，繼前發言人張秀賢、劉貳龍等人宣布退會或退任，學民前發言人黎汶洛尋日亦發聲明，坦言因為學民內部對佢喺立法會新界東補選中，協助公民黨楊岳橋助選而表示不信任，故決定退出學民。黎汶洛退出之後，學民活躍嘅骨幹成員好似得番黃之鋒及周庭，認真係眾叛親離，而學民內部嘅路線之爭亦更見明顯。
路線分歧 組黨存隱憂
學民之前曾發聲明，話今次新界東補選唔會支持任何一位候選人，但成員之一嘅黎汶洛就多次幫楊岳橋站台。黎汶洛尋日一見傳媒，就坦言已經退出學民，話雖然已經退任發言人，但發言人嘅形象太深入民心，自己幫楊助選，會被誤會為學民官方取態，加上有人對佢擺明車馬撐楊有疑問，覺得無謂左右逢源，故決定退出學民。黎汶洛同學民存在路線分歧，睇嚟要合作組黨都唔係咁容易，唔知黎汶洛會否入其他政黨參選立法會呢？