中環出更：改良搶孤 「松」台南取經
唔少名人一年忙到晚，農曆新年就成為陪伴家人享天倫樂嘅好時機，好似香港潮屬社團總會（總會）主席陳幼南就留港陪一對外孫過節；但亦有唔少人選擇外遊度歲，總會會董胡炎松就同家人去台南旅遊。一向積極保育潮州文化嘅胡炎松就把握機會，趁外遊順便考察，研究改良潮州傳統活動「搶孤」比賽。
總會喺去年盂蘭節舉辦首屆「搶孤」比賽，參賽者要企喺台上掟迷你米袋，對手就要用大型竹簍搶接。
搶接米袋比賽 移師維園
胡炎松喺潮屬社團總會團拜活動上話，今年將會有大進步，因為比賽會由觀塘移師到銅鑼灣維園舉行，佢亦「心郁郁」想邀請官員出賽，但眼見食物及衞生局局長高永文早前連跑步都仆倒受傷，所以都有啲擔心安全問題。
胡炎松透露，今次考察台南恒春搶孤嘅場地布置及搭棚方式，希望可以應用到香港。但由於當地搶孤方式太激烈，參加者要爬上搽滿牛油嘅柱體，胡炎松就話香港需要改良，以安全為上策。
總會秘書長方平新年期間亦同家人去咗澳洲大堡礁旅行，更同女兒齊齊潛水添。方平話今次係第一次孭氣樽潛水，即場學完就膽粗粗落水，十幾米深嘅水底令佢覺得好新奇，仲覺得好壯觀添！但話因為保育區唔可以打魚，所以專心欣賞水底生態就足夠喇！
另外，前立法會議員梁劉柔芬（Sophie）就同卓妮分享，新年期間睇咗套講保育嘅港產片，大讚導演構思夠深入，將題材成功扭到合大眾口味嘅角度。Sophie仲對旺角暴亂事件感到痛心，但好彩佢第四個孫喺年初二出世，睇嚟抱孫已令佢忘卻煩憂喇。
卓妮