一般人過咗正月十五都唔會再派利是，但立法會議員梁美芬尋日喺傳媒茶敍上仍然拎住一大疊利是周圍派，仲派咗兩封畀金融服務界議員張華峰（肥老闆）。梁美芬興致勃勃同肥老闆介紹兩個唔同款式嘅利是封，其中一個係印有佢嘅漫畫公仔造型。肥老闆收到利是之後，即刻舉高照吓利是封入面裝住幾多錢，唔通佢覺得梁美芬會封大利是畀佢？雖然唔知封咗幾多錢，但肥老闆睇完就將利是放喺西裝褸左邊胸前個袋，仲凸出梁美芬個漫畫公仔幫手賣廣告添，都算唔話得喇！
（李彩荷攝）
