弱勢政府萬事哀，政策推出一項跪低一項已成慣例，所謂的「成熟一項推出一項」成了一眾高官鋪蓋窩裏聽廣播——自得其樂外，市民大眾看在眼裏，卻只能如棉花塞鼻孔——憋得難受！
本屆政府施政除了口噏噏當秘笈，就是志大才疏，大言炎炎搞呢樣整嗰樣，到頭來「大事做不了，小事做不好」，徒惹爭議不斷、怨聲不絕。阿哥，你話喇，一次又一次失信於民，咁嘅政府，還有甚麼「管治威信」可言？
政府搞大型基建，好似西九文化區，二○○一年政府首次提出「西九」，二○○四年首次「三揀一」，然後經歷官商勾結指摘，在二○○六年「推倒重來」，之後再由各個委員會漫長地諮詢……當年政府推廣時，強調西九是城市基建，以各種海濱計劃和都市重建來提高生活質素，吸引國際人才，在全球都市——或起碼在其他亞洲城市中脫穎而出……然而，到了今天二○一六年，十五年過去了，西九仍是空中樓閣，夕陽西下，只能愁聽維多利亞的流水滔滔東去，「西九文化區」——徒惹「人自傷心水自流」！唉，早知今日，何必當初，不如在老朽居住的野村，建一層圖書館實際些！
本屆政府連一個尖沙咀星光大道優化計劃都跪低，政府從來沒有吸取教訓，錯完可以再錯，康文署今次思慮不周，自把自為，最終又被指違反程序公義，好好的一個擴建計劃，由最初吹到恐龍咁大，終於又變成鵪鶉咁細，難怪本報「正論」質疑政府類似鬧劇一再上演，所謂要發展大嶼山、打造東大嶼都會，說穿了又係「自欺、欺人、被人欺」三部曲！香港未來，若然只靠一個好吹得嘅政府，睇怕你同我都好難安居樂業，政府患了萎縮絕症，港人嘅安樂茶飯已隨風而逝！