政情：王國興「天殘腳」功成告別
工聯會立法會議員王國興平日除咗金句多多，亦係議會內的道具王，不時在發言批評政府及泛民主派時以自製道具配合演出，其中最「突出」嘅肯定係為單肢殘疾人士爭取申領傷殘津貼資格嘅道具「天殘腳」。不過，王國興話隨着新一份施政報告終於落實措施，天殘腳係呢幾日最後一次亮相，從此就會告別議會。
單肢傷殘津貼獲落實
王國興發言時話，早在○七年已經向政府爭取向單肢殘疾人士提供傷殘津貼，建議橫跨三屆政府、足足十年後終於有成果，單肢殘疾人士同時可獲乘車優惠。他特別感謝義工製作逼真假腳「感動」社會和政府，又感謝市民在假腳上簽名支持。
王國興過去著名道具包括爭取男士侍產假嘅道具BB、要求從速「剪布」嘅金鉸剪、批評前特首曾蔭權爵士「擠牙膏」式供應房屋嘅紙製牙膏，以及不滿施政報告措施「有頭無尾」嘅「直布羅陀猴子」等。