政情：步「向」親切感 標誌英文轉細楷
位於港島南區嘅數碼港新一年會有變動，董事局主席周文耀會退休，在今年中任期屆滿後退下來享受人生，而該公司由○二年創立沿用至今的標誌，亦由尋日起換新裝。數碼港行政總裁林向揚話，新標誌走簡約路線，只留下cyberport及數碼港名稱，其他裝飾完全冇晒，字母亦用晒英文細楷，一改以前全部用大楷嘅寫法，好有親切感，冇英文大楷予人嚴肅方正嘅感覺。
受求學時經歷影響
點解用咗細楷會平和啲？林向揚話，對佢嚟講英文大楷字係一條刺，事關讀書時因為趕時間，做功課打字時全部用晒英文大楷，點知教授好介意，話唔鍾意睇全部大楷，叫佢重新打過，結果愈急愈衰，自此便感到英文細楷好親切，相信人人都會易接受啲。不過，名稱是代表公司，用晒細楷又會否太過傾向佢嘅個人喜好及觀感呢？
至於董事局主席一職會由誰人接任，即將退任的周文耀就話唔知，似乎係賣關子，佢話只知道退下來後，要好好享受人生，現時要積極完成餘下任期。