中環出更：帶團考察絲路 「成」日無時停
新正頭唔少商會都舉行新春團拜，非常熱鬧，日前輪到潮州商會及汕頭商會於同日向大家拜年。講開新春前後旅遊大計，好多「家己冷」都有出行，好似潮州商會會長張成雄與兒子張俊勇（Thomas），剛剛去完奧地利旅行回港，張成雄嚟緊又會親自帶隊去絲綢之路之旅，考察西安等地。而汕頭商會會長葉振南（Stephen）在農曆新年前就到英國倫敦探望讀書嘅愛女。
Thomas話，去到奧地利聽聞當地早前發生雪崩，好在佢哋去到之後冇發生咩事，只係女兒滑雪時跌傷腳，小腿骨附近有條大約頭髮絲粗度嘅裂痕，問佢點解唔好好照顧女兒時，佢就話自己都有受傷，但只係跌傷咗隻腳趾啫，真係唔知好嬲定好笑。張成雄就話，嚟緊佢會親自帶隊去陸上絲綢之路考察，包括甘肅、新疆等地，一直向西行，預計有約五十人參加。
張成雄話，早幾年好多人去星馬泰，而近期就興講一帶一路，但莫講話逐個地方名數出來，好多人連呢啲地方喺邊都唔知，所以認為應該要帶大家一齊去考察加深吓認識喎。卓妮同場仲見到潮州商會名譽會長兼民政事務局前局長藍鴻震，講起近日好多人自稱「本土」，佢就話潮州人在香港超過一百年，講本土潮州人認第二，就冇人敢認第一喎。
葉振南過年後恨抱孫
汕頭商會方面，一班成員亦齊齊出席團拜，包括會長Stephen、榮譽主席陳有慶、常務會董張詩培及會董陳永豪等。Stephen話，新年去完倫敦探望愛女後，就喺農曆新年前趕返回香港，呢幾日都忙於向親友拜年，而佢個仔去年結婚，除咗多咗新抱呢家人一齊過年，佢仲好希望快啲抱孫添。
卓妮