中環出更：高佬賢恨生仔
新正頭最緊要利利是是！一班議員放完新春假期後，尋日返到立法會梗係大派利是，求番個應節好意頭。超恨生仔嘅漁農界立法會議員何俊賢（高佬賢）派咗兩年利是，都仲未有小朋友幫手「扌豆」番幾封利是，原來有難言之隱，仲透露已經同太太一齊去睇中醫補身谷生仔！
高佬賢過年前曾經透露生仔有困難，因為夜晚同太太分房瞓，唔通感情出問題？其實只係因為佢夜晚放工太攰，經常唔小心喺梳化瞓咗，搞到太太詐晒型，質問佢做咩唔入房瞓，咁搞法好難唔影響「造人」。
黨友教路 同老婆食中藥
其實高佬賢不知幾恨生仔，佢見到黨友陳恒鑌（Ben）生完一個又一個，即刻向對方請教生仔秘訣，Ben就介紹咗個中醫畀佢識。高佬賢於是急急腳同太太去求診，結果中醫就要佢哋各自執番劑中藥補身，最好就盡量日日飲，太太仲要另外煲薑水浸腳。而佢太太飲咗三個月左右，手腳真係開始暖啲喇，睇嚟相當有效喎！
另外，商界議員林健鋒（Jeffrey）都袋到全套西裝都係利是，最少有一百封，佢話有時都會摸吓後褲袋，確保無跌嘢喎。不過，佢派利是之餘，都仲有「扌豆」利是，皆因港大校委會前主席梁智鴻係佢喺聖約瑟書院嘅師兄，早前遇到師母梁太都有派利是畀佢。
前「立會方中信」未失過戀
議員單仲偕今年鐵定離開議會，佢多年前曾被冠以「立法會方中信」稱號，但近年呢個已經被紡織及製衣界議員鍾國斌取代。佢尋日就帶埋相簿去立法會，同記者話當年。最令佢自豪嘅一張相，就係廿八年前擔任葵青區議員時，與街坊到流浮山旅行所攝，相中仲有佢太太。被問及太太係咪佢嘅初戀，單仲偕即刻霸氣話「我未失過戀！」咁係咪意味佢認識太太前未拍過拖呢？
卓妮