政情:強積金對沖爭議 人日照開火

尋日係年初七「人日」,再加埋西方情人節,應該開開心心至係,然而於勞資雙方金睛火眼睇實嘅勞資問題,雙方於人日都無面畀,繼續隔空駁火。

工業界議員梁君彥於英文電台節目中,開宗明義指取消強積金對沖機制係倒退,會令到好多中小企執笠;另一邊廂,工聯會議員郭偉強同王國興則隔空反擊,繼續要求盡快實現取消強積金對沖機制等議題,真係唔講仲以為尋日係年初三赤口。

勞工界一直爭取盡快落實取消強積金對沖機制,梁君彥表明若然取消會造成更多問題,事關依家香港嘅中小型企業有超過一百萬名員工,亦都係香港經濟最根本嘅支柱,佢表明,如果要檢討強積金制度,應該要評估商業環境,唔應該操之過急,如果唔係會影響長遠經濟發展。

勞方借花車巡遊叫陣

事有湊巧,工聯會尋日舉行新年花車巡遊,主打盡快實現取消強積金對沖機制、標準工時要立法等議題,擺明隔空向工商界叫陣,勞資雙方於人日繼續各不相讓,當局如希望取得共識似乎要再下一番苦功嘞!

第一手消息請下載on.cc東網iPhone/iPad/Android/Windows Phone Apps