中環出更：「漢」準機會 提升國際排名
近年校園紛爭不斷嘅香港大學，國際排名每況愈下。卓妮早前見到嶺南大學校長鄭國漢，問佢會唔會趁港大自亂陣腳時，爭取提升大學排名？佢就笑笑口話，嶺大係小型大學，同港大唔同級別。不過，依家嶺大校園內已冇爭議性議題，確係提升自身教學質素及聲譽嘅好時機，所以會積極爭取與同類型大學嘅競爭排名有所提升。
早前中華廠商聯合會（廠商會）舉行晚宴，廠商會會長李秀恒邀請香港生產力促進局主席劉展灝同一班廠家分享經驗。鄭國漢都係座上客，仲趁機向一班廠家老闆推銷嶺大學生添。香港青年工業家協會會長張華強（Jacky）都在場，卓妮見佢同仁愛堂副主席羅台秦好好傾，事關Jacky做過仁愛堂總理及副主席多年。
親自帶隊 「強」戰極地
Jacky熱愛挑戰極限嘅活動，「仁愛堂極地之旅」項目就係佢做總理時提出，佢亦連續多年親自帶隊。近年佢就進一步挑戰撒哈拉沙漠超級馬拉松，跑足七日，旅程十分難忘。
同場仲有廠商會副會長戴澤良（Tony）、青委主席顏明秀及前主席張永鴻等一班年輕人。Tony啱啱帶隊到台灣參加年貨大展，今次小試牛刀，結果魚蛋及蘿蔔糕等港式食品大受歡迎，惟港貨入台仍有唔少障礙，希望日後可以有突破發展。
卓妮