中環出更：拉布累事「帆」體揮春產量少

不過，今年EQ就大呻因為泛民主派「拉布」，連累到建制派都要被迫留守立法會湊人數開會，少咗時間去落區寫揮春，今年產量急跌囉！

以往寫夠五千張

EQ尋日拉埋民建聯沙田同西貢支部黨友舉行新春團拜，除咗祝願香港「唔好拉布」，亦乘機要求財政司司長曾俊華派糖，包括減差餉兼退地租。講起「帆」體字，特色係字體粗線條而且圓碌碌，由「福」字，到「大吉」同「招財進寶」都好受街坊歡迎，EQ每年落區閒閒哋都寫番四、五千張揮春。

雖然EQ手寫揮春產量跌，但任內提出質詢次數就節節上升，佢話過去四年大家都聚焦佢打擊象牙走私活動，其實佢仲研究好多婦女同科技議題，包括爭取為女童注射預防子宮頸癌疫苗及成立創新及科技局。唔通EQ提早為爭取連任鋪路？不過，該黨最近興「普選」，要出選新界東又使唔使內部投票呢？

卓妮