唔到你唔信邪，本港大年初一出現「五星連珠」天文現象，有堪輿家斷言香港必有動盪。話口未完，當晚就爆發六七暴動以來最嚴重嘅旺角暴亂，同有關預言不謀而合，簡直夾都冇咁準。
年初一暴亂開年，簡直大吉利是，最諷刺嘅係，當局歌舞昇平嘅節目源源不絕，又花車巡遊，又煙花匯演，好似慶祝咁款，同社會氣氛完全格格不入。古詩有云，不道江南春不好，年年衰病減心情。其實今日唔少港人都有呢種感嘆，花車巡遊唔係話唔好睇，煙花匯演更加普天同慶，之不過香港今不如昔，愈嚟愈亂，仲點有心情欣賞吖？今年煙花匯演大搞噱頭，發放二萬三千八百八十八枚，包括砌出六十張猴子笑臉圖案，寓意笑迎猴年，可惜吖，香港家陣動盪不安，變成亂迎猴年。
話時話，香港政局紛亂，令人笑唔出嘅又點止暴亂吖。立法會近年深陷政治泥沼，唔係拉布就係流會，唔係掟嘢就係爆粗，七國咁亂，幾乎無做過一件正經事，睇見都令人眼冤。其實，反對派政客為反而反，癱瘓議會，騎劫社會，亦係另一種形式同暴動嚟（口架），分別只係所用嘅武器唔係磚頭同鐵通，而係拉布同流會。立法會發揮唔到為民喉舌嘅職能，反而淪為社會亂象嘅根源，點能夠唔令人憂心吖？
香港除咗政治紛亂，經濟民生一樣唔掂。隨着外圍環境不斷惡化，加上旅遊業及零售業等支柱行業無以為繼，本港整體經濟陰霾密布，危機四伏，新春市道就係一個清晰警號嘞。尋日係車公誕，有車公廟外擺賣嘅檔主大呻，今年生意大跌三分之二，係十幾年來最差嘅一年；有上環老字號海味舖亦話，海味生意近年一直下滑，舊年更加下跌一成，形容係開業四十九年來最惡劣嘅時刻，究竟經濟大環境差成點，畫公仔唔使畫出腸喇。至於民生問題咯喎，更加唔使嘥口水，教育、醫療、房屋、安老、食物安全等冇瓣掂，民生早就變成「民怨」，問你點頂。
所以話，新年流流，市民都好想笑口常開，暫時拋卻煩惱，好好欣賞花車同煙花，但可惜現實好難做到。冇計喇，香港沉淪，豺狼當道，政客固然無良，官僚同樣無能兼無德，爛泥扶不上壁，就算社會要求設立全民退休保障制度嘅呼聲不絕於耳，佢哋照樣當聽唔到，港人想過安樂日子都難喇。最匪夷所思嘅係，假難民問題愈演愈烈，淪為社會不穩定嘅最大隱患之一，當局拆彈依然軟手軟腳，淨係呢樣已經令香港冇運行喇。
「金猴奮起千鈞棒，玉宇澄清萬里埃。」講到尾，人定勝天，如果港人好似靈猴咁機智靈活，寬厚親和，就算遇到乜嘢逆境，都可以逢凶化吉。怕就怕港府係是非不分嘅昏僧，縱然孫大聖有降妖除魔之能，都係徒嘆奈何嘅咋。