政情：體育專員 「強」項手球
今年《施政報告》終於落實設立體育專員，但政府選擇從內部挑選公務員出任，而唔係搵退役運動員出任呢個職位。首任專員楊德強尋日同傳媒茶敍，數白欖講番自己玩過乜嘢運動，除咗較為熱門嘅足球、籃球、壁球外，大學年代佢仲係手球港隊代表添！
組元老隊 公開賽入八強
楊德強話，八十年代讀港大時，曾經代表大學打手球，位置係打輔鋒，贏咗學界冠軍，之後就入咗南華會手球隊，又贏埋全港聯賽冠軍，所以當時有外隊嚟香港比賽，就會搵佢打比賽。不過，自從出嚟工作後，就擺低咗呢啲興趣，反而近年一班兄弟組成南華元老隊，打全港公開賽打到八強，轉咗位置做翼鋒仲可以入到波，隊友笑佢係年紀最大而入到波嘅人。
去年十一月世界盃亞洲區外圍賽「港中大戰」，令到好多官員唔知支持邊隊好。楊德強就話，身為負責本地體育發展官員，一定支持港隊，又話當晚有份喺現場睇波，噓國歌嘅人只係好少數，之後佢有同內地相關部門解釋，對方都理解，相信唔會影響兩地關係喎。