中環出更：夏千福發白日夢賀年
一向活躍於網絡世界嘅美國駐港總領事夏千福，趁農曆新年前夕拍攝賀年短片。短片長約四分鐘，夏千福全程以廣東話演出，片末更化身為中國名著《西遊記》中嘅唐三藏，到領事館內各個部門祝賀職員萬事如意，但最後先發現係發緊白日夢，趣味性甚濃。
片中開首有一把女聲叫夏千福完成使命，原來聲音來自佢所處嘅辦公室內一幅觀音畫像。夏千福對使命充滿疑問，後來得到觀音指點，夏千福只要遇到三個徒弟，一生就會改變。畫面一轉，佢就到咗澳門食葡撻，並用照妖鏡發現第一位徒弟豬八戒，然後一齊返到香港嘅車公廟。
車公廟前變唐三藏
到達車公廟後，夏千福又遇到猴子孫悟空同沙僧，而佢就化身為唐三藏，一行四人向領事館內嘅職員拜年。正當興高采烈之際，有人叫醒睡夢中嘅夏千福，並提醒佢係時候拍新年片，呢個時候先知道自己化身唐三藏只係一場夢。最後佢同領事館仝人拍攝大合照，並祝賀大家猴年快樂，萬事如意。
卓妮