年宵市場開鑼喇！往年呢個時候，好多市民會大破慳囊趕辦年貨，一來準備過年，二來行大運。不過今年唔同往日，天氣固然特別寒冷，經濟亦係寒氣逼人，檔主生意難做，睇怕只能望天打卦。
唔係杞人憂天o架，好似維園年宵市場咁，開鑼首日雖然不乏湊熱鬧嘅市民，但係人流明顯不及往年，就算幫襯亦不似以前咁爽手。有檔主打定輸數，唔使蝕本已經偷笑；亦有花檔睇淡銷情，就算租金成本上升一成半，亦唔敢加價。大家話嘞，今年嘅銷情係咪同氣溫一樣咁冷吖？
點解年宵市況欠佳呢？其中一個原因可能同天氣有關。即係咁，今個冬天特別冷，寒潮去咗又來，尋日寒風勁吹，加上細雨連綿，又凍又濕，的確有啲天公不作美。之不過咁，年宵市道不樂觀，除咗因為天氣差，更加因為經濟差，唔少市民對來年悲觀咯，又點會有心情消費吖。其實，唔好講年宵攤檔吖，由於經濟逆轉加上網購成風，利是封同揮春飾品嘅銷情同樣急轉直下，有商戶銷售額銳減三分之二，其他閒閒哋都下跌三成，簡直慘不忍睹。
一葉知秋，年宵市場同新年飾品銷情不利，其實就係整體經濟前景不妙嘅警號。呢，港府公布最新零售銷售貨額，去年十二月嘅跌幅再擴大至百分之八點五，創下全年單月最大跌幅，而去年全年亦下跌百分之三點七；各類商品嘅銷售額更加幾乎滿江紅，其中跌得最甘嘅係珠寶首飾及鐘錶，勁跌一成七。一損俱損，旅遊業不景，成個零售業陷入寒冬，今個新年有乜可能唔處處吹寒風吖！
唔係嚇你，環球經濟隱憂重重，無人可以獨善其身，連「大笨象」滙豐控股都要全球凍薪及凍結招聘就知大鑊喇。正所謂，春江水寒鴨先知，銀行係「百業之母」，滙控仲係本地龍頭銀行添，家陣都要出到「雙凍」呢招，經濟形勢有幾惡劣，畫公仔唔使畫出腸喇。
最令人擔心嘅係，以前香港有乜風吹草動，都有內地呢條大水喉射住，可惜依家內地經濟下行壓力大，自身難保，就算想打救香港都無能為力喇。受到近期內地股市下滑及人民幣貶值等因素影響，農曆新年期間訪港內地團直線下跌，估計將由每日三百八十團跌至二百五十團或以下。本港經濟前景堪憂，各行各業遍吹淡風，莫講年關難過，隨時成個二○一六年都要食驚風散吖。
一句講晒喇，喺呢個風高浪急嘅環境，政府靠唔住，政客添煩添亂，大家除咗勒緊褲帶之外，最緊要自求多福吖。