中環出更：榮升靚太 陳家珮爭取生猴B
新民黨主席、立法會議員葉劉淑儀尋日拉大隊到維園為其年宵攤位主持開幕兼切燒豬儀式，順便嚟個靚女成員大晒冷，包括南區區議會海怡西議員陳家珮（Judy）、新民黨青委執行副主席王政芝（Gigi）及新成員大律師容海恩等。講到猴年願望時，去年五月結婚的Judy就大爆自己屬猴，所以要盡快抱番個猴B喎！
同樣結咗婚將近一年嘅Gigi，則於早兩星期最凍嗰日去咗馬爾代夫避寒兼補度蜜月，佢仲話自己都好鍾意小朋友，雖然知道急唔嚟，但都想喺三十五歲之前生番一仔一女。
葉劉克服「麒麟」陰影
至於葉劉就戴住隻猴子公仔亮相，祝市民可以好似靈猴一樣咁「厚祿」、豐衣足食，又希望泛民議員猴年唔好好似齊天大聖咁大鬧天宮。講起去年農曆新年被麒麟撞飛，葉劉就話自從早前做咗客家功夫文化研究會榮譽主席後，同啲麒麟師傅熟落咗，所以嚟緊大年初二除咗會以嘉賓身份再去車公廟外，仲想邀請啲麒麟陪佢落區新年行大運，反客為主，表現一貫硬朗作風。
卓妮