中環出更：皇仁擺年宵 舊生捧「祥」
皇仁書院創校百年人才輩出，今年第四年喺學校隔籬嘅維園擺年宵攤檔，自然獲多位名人校友撐場，其中立法會前秘書長馮載祥（Ricky）更以皇仁舊生會名譽顧問身份，同多個一九六六年畢業嘅大師兄，及號稱立法會「最大校友黨」成員醫學界梁家騮、民主黨胡志偉及會計界梁繼昌（Kenneth）幾個小師兄為檔口即席揮毫添！不過，雖然皇仁仔出名讀書成績好，但佢哋手毛筆字似乎唔及英文寫得好睇喎。
幾乎年年都捧皇仁場嘅志偉率先為師弟們寫「大吉」，再同Kenneth嘅「大利」合體，志偉身兼黃大仙區議員多年，寫「大吉」難佢唔倒，但Kenneth唔知係咪留學英國唔記得晒中國書法，竟然用執原子筆方法寫毛筆字，作品當然得啖笑喇。而退休後甚少露面嘅Ricky，寫個「福」字都充滿「童真」，似足小朋友書法。
梁家騮自認手字差
本身係醫生嘅梁家騮自認手字麻麻哋，所以開藥單時，尤其涉及劑量等數字一定會特別小心，如果唔係劑量隨時係十倍上落。至於個名有個「騮」字係咪同猴子有淵源，梁家騮笑言唔係屬猴，純粹兄弟輩都用「馬」字旁改名，屬虎嘅佢猴年更犯太歲添。
Kenneth就藉猴年將至，乘機話猴子代表靈活、聰明嘅動物，希望議員猴年都會靈活運用議事規則，應該通過嘅議案就快啲通過，唔應該通過嘅就「慢慢」通過。好彩同樣係皇仁仔、但反對拉布嘅地產及建造界石禮謙同工程界盧偉國今年雙雙缺席，否則四人同場會否擦出火花呢？
卓妮