民協日前換屆，由加入民協十六年的女將莫嘉嫻擔任主席，副主席則由譚國僑及施德來出任，新一屆中委成員平均年齡為四十一點五歲，比上屆年輕超過三歲。莫嘉嫻形容，民協年輕化，係要回應市民求變嘅聲音，而佢哋亦有好多後生仔想出戰九月立法會選舉。不過，講到部署就大耍太極，據講係要等埋該黨「靈魂」、立法會議員馮檢基（阿基）的參選去向先可作決定，睇嚟「年輕化」喺黨內已遇到障礙。
去年區議會角逐連任失敗、痛失俗稱「超級區議會」嘅區議會第二功能界別入場券嘅阿基，早已明言唔會翻兜「老巢」九龍西，咁嚟緊立法會選舉最終會落戶邊到呢？莫嘉嫻就話唔知道，笑稱阿基地位超然，反叫記者問番阿基。佢又話，根據黨程序，立法會名單要等到六月由中委確認先得。須知道立法會選舉好難打，一早就要落區工作，如果下下等埋阿基想點同個黨確認先落區宣傳，睇怕都係咁先喇！
至於民協未來動向，莫嘉嫻話，現時中央政府同特區政府都唔願意同泛民傾，所以未來要「為香港砌到盡」，要靠「砌」去帶出香港人聲音。而民協未來亦會向其他泛民政黨借鏡，多使用網絡作宣傳工具。