政情：上海新迪園 「仲」係冇興趣
上海迪士尼樂園將於今年六月十六日開幕，立法會議員單仲偕係出名嘅迪士尼迷，加上佢係六月十五日生日，可以順道去玩兼慶祝，但係佢就表明對上海迪士尼冇乜興趣，話聽唔慣啲普通話版嘅迪士尼名曲喎！
單仲偕透露，全世界嘅迪士尼樂園佢都去過晒，有啲仲唔只去過一次，例如佢度蜜月時就去咗日本迪士尼，囝囝出世時就去加州迪士尼，但佢個人就最鍾意佛羅里達州嘅迪士尼，貪佢夠大夠好玩喎。
陪仔睇過百次《獅子王》
單仲偕仲話，兩個仔最鍾意睇迪士尼名著《獅子王》，細個時幾乎日日放學都睇，前後睇咗超過一百次，搞到當年盒錄影帶連磁帶都斷埋，但依家佢哋大個咗，口味已經轉晒，之前一家四口去咗倫敦睇歌劇版，一張飛要四百幾蚊港紙，佢話覺得好貴，但其實同迪士尼門券差唔多啫。