中環出更：拉布遇寒流 建制變「病軍」
立法會尋日繼續審議《二○一四年版權（修訂）條例草案》，唔知係因為拉布搞到建制派過度疲勞，定係因為氣溫驟降，唔少議員都病倒，就連立法會主席曾鈺成都病到返唔到立法會主持大會。有份拉布嘅議員陳偉業就話，建制派個個病晒，部分更年過七旬都要罰坐，搞到佢都過意唔去。如果係咁，停止拉布就最實際喇！
鍾樹根嘔都照開會
立法會尋日復會，但就唔見曾鈺成蹤影，原來佢身體不適。鍾樹根同樣冇現身立法會，日前佢喺立法會不停食黨友黃定光嘅貴價陳皮，有人見到佢連啲陳皮跌咗落地都執番嚟食，唔通因此搞到腸胃不適？樹根就話係患咗重感冒，感冒菌入腸，所以先係咁嘔。佢中午睇完醫生後就返立法會開會，聲稱要帶病作戰。同樣腸胃唔妥嘅葉太就話，唔知點解肚痛，不過搽咗白花油就冇事喇。
泛民議員胡志偉都眼紅紅作感冒，不過佢就拒絕食藥，話要信自己有抵抗力喎。同樣作病嘅教育界議員葉建源就話，立法會太多人病，成日「焗」住喺度好易傳染。其實泛民因為拉布成日唔喺會議廳，又點會被傳染呢？真係賴得就賴。
卓妮