政情：書「文」斷絕立會關係
立法會近年無休止拉布，泛民議員不停響鐘點算法定人數令人好煩厭。前立法會秘書長吳文華（Pauline）由於應承咗幫立法會寫書，退休後都經常返去立法會做嘢，終日聽住「叮叮噹噹」嘅鐘聲，連佢都話已經「頂唔順」立法會喇，決定終止呢段長達廿幾年嘅「關係」，轉為自資成立社企，為香港人做番啲實事。Pauline又話，早前立法會發生嘅垃圾桶爆炸案同「詐」彈恐嚇事件，反映有市民覺得啲議員代表唔到自己，希望議員聽吓佢講喇！
Pauline上周剛剛完成幫立法會寫書嘅工作，待秘書處完成翻譯同議員過目後就可面世，直言「同佢（立法會）嘅關係已經冇咗」。
《議事規則》有待改進
對於立法會不斷響鐘點人數，精通香港立法機關歷史嘅Pauline指出，《議事規則》係英國人留落嚟嘅，回歸前都經過多次修改，回歸後亦有需要與時並進，因為啲議案通過唔到，香港就冇得向前行。不過佢承認，依家立法會不同黨派嘅合作空間好窄，如果大家都只顧攬住自己利益，佢都冇辦法。
盼成立網站助長者
Pauline又話，立法會內「叮叮噹噹」嘅拉布鐘聲，令佢加倍努力諗吓可以點樣幫香港做番啲實事，最終決定成立一間社企，專門聘請殘疾人士及退休長者，幫佢手搞番個長者資訊網站平台，協助啲老人家同佢哋嘅照顧者取得各項有用資訊。
資金方面，Pauline決定將佢喺聯合國擔任國際議會顧問賺到嘅錢，揼晒落間社企度，長遠則希望透過網上廣告支持網站營運。佢依家已經喺尖沙咀租咗個辦公室，仲搵咗幫開殘疾人士嘅組織，睇吓間辦公室嘅設施係咪符合殘疾人士需要，認真細心。佢估計間社企會喺農曆新年前後開始請人，請夠人手就開業。