中環出更：「福」蔭子孫 花枝招「展」
向來予人感覺粗豪嘅十八鄉鄉事委員會主席梁福元原來都有柔情一面，佢最近歸園田居，同佢細仔、同屬元朗區議員嘅梁明堅（Jason）父子檔明日起在大棠舉辦漢牡丹展之餘，梁福元更表明希望Jason可以全力接棒，等佢可以早啲退休，同湊成兩個「好」字嘅四個孫仔女三代同堂。
梁福元前年將哈爾濱冰雪節引入香港，喺大棠有機生態園建造大型戶外冰雪館搞冰雕展覽，可惜當年冰雪節撞正佔領行動，大批內地客取消來港，最後要蝕少少收場。梁福元今年決定食住大棠賞紅葉條水，斥資逾三百萬元，專誠從河北引入十六款、過萬棵漢牡丹來港展覽，展期於明日開始，為期兩個月，號稱全港最大型漢牡丹展。
據知漢牡丹品種罕有，香港氣候原本唔適合種植牡丹，梁福元專誠搵內地專家來港培植，展期開始前所有牡丹都要先放入低溫庫暫存，避免牡丹提早開花，展覽每隔兩星期就要換過批準備開花嘅漢牡丹，相當揼本。
睇好囝囝後輩接棒
梁福元今次拍住Jason負責花展設計，自言中學未畢業嘅梁福元透露，原來早喺九十年代已經修讀華南農業大學果樹系文憑，至於Jason早年喺倫敦大學學院（UCL）修讀電子及電機工程，回港後前後花咗四年時間，讀咗中大專業進修學院園林設計及管理，同樹藝師兩個高等專業文憑，於大棠嘅務農工作唔使假手於人。
另一方面，Jason於一二年迎娶被指貌似華姐冠軍苟芸慧嘅Alice後，兩公婆兩年抱兩，生咗兩個囡囡，雖然佢哋冇丁權，但梁福元大仔梁智峯亦生咗兩個囝囝，啱啱好湊成兩個「好」字。梁福元仲話，一早睇透「老人政治」行唔通，睇好Jason同由佢一手提攜嘅新任元朗區議會主席沈豪傑接棒，難怪佢日前表明立法會選舉只會幫鄉事派「抬轎」，無意親自出征喇。
卓妮