中環出更：地圖鋪「璋」「成」屋書香
崇奉儒釋道三教嘅圓玄學院前日舉行慈善晚會，有為數百名賓客出席支持，人稱「地圖王」嘅著名古物收藏家譚兆璋，亦招呼咗一班朋友去撐場，包括前建築界立法會議員劉秀成。譚兆璋自言，佢嘅地圖藏量多達三十萬，分別存放咗喺八個倉。劉秀成亦不甘示弱，自爆收藏咗無數嘅書籍，送都冇人要，都唔知點處置好。農曆新年就到，送「輸」畀人梗係冇人要喇！
本身係建築師嘅劉秀成同卓妮講，雖然佢冇特別嘅收藏喜好，不過都有樣嘢就多到爆，就係書本喇！佢冇認真數過究竟有幾多，但就形容辦公室及屋企都擺到滿晒，當中好多書都同建築有關，想捐畀圖書館都冇人要，但自己又唔捨得丟棄，真係頭痛。
年花大王：應景蘭花熱賣
卓妮喺晚會上，又見到外號「年花大王」嘅香港鮮花盆栽批發商會盆栽部主席賴榮春（Sunny）及香港玉器商會副主席何志生。Sunny透露，雖然近期經濟不景，但對鮮花及盆栽市道影響不大，尤其係農曆新年臨近，適逢來年係猴年，有好多人預訂猴臉蘭花應吓景，就算價錢貴過蝴蝶蘭十倍都無所謂。
香港道教聯合會主席梁德華都有到場，早前有佛寺爆出醜聞，宗教界會否做啲嘢，防止類似事件再發生？梁德華指不同宗教已有唔少規條及戒律，若有人唔肯遵守，甚至導致道德崩潰，惟有交畀法律制裁，以儆效尤。
講番個活動本身，圓玄學院主席陳國超表示，本港認知障礙症患者數量不斷飆升，希望透過活動為患者籌募善款，見到咁多老友支持，令佢十分開心。
卓妮