近日旅遊業界內訌，業界為抗議旅遊業議會（旅議會），仲發起唔佩戴導遊證等連串不合作運動。旅遊業界風頭火勢，商務及經濟發展局局長蘇錦樑（Greg蘇）尋日就喺傳媒茶敍上被問到，業界發起不合作運動，又唔戴導遊證，會唔會令旅議會更加難以監管。Greg蘇竟然講風涼話︰「我睇唔到戴證有咩困難，點解要做啲嘢減低自己競爭力？」其實旅遊業界今時今日嘅矛盾，都係源於Greg蘇一直對成立旅遊業監管局懶懶閒，枉佢仲話要靠旅議會同業界溝通先可以解決問題，真係唔該講少句當幫忙啦！
