中環出更：善團訪立會 「雲」想當年
尋日立法會好熱鬧，事關又係六大慈善團體一年一度到立法會與議員茶敍同參觀嘅日子。百幾位善團成員難得濟濟一堂，梗係周圍影吓相留念，部分人更係第一次嚟立法會參觀，對周圍事物都非常好奇。卓妮喺佢哋參觀香港立法機關歷史長廊時，見到博愛醫院總理藍王雲仙對啲舊立法局文件極感興趣，仲話令佢諗起當年中學留學日本時嘅情景喎。
之前已嚟過立法會嘅博愛主席譚姜美珠尋日充當導賞員，帶住第一次嚟嘅總理蕭何元鳳及藍王雲仙參觀。藍王雲仙表示，香港同好多外國學生都非常留意政治同時事，但根據佢當年喺日本嘅經驗，當地同學普遍對政治冇乜興趣同意見。佢又自爆曾遭當年學生欺凌，認為佢係留學生就冇資格上台彈琴，將佢推咗落地，令佢日後更加發憤同愛國。
仁愛堂主席熟晒路
除咗博愛醫院，東華三院、仁濟醫院、保良局、仁愛堂同樂善堂尋日亦有參與茶敍。仁愛堂主席史顏景蓮及總理李慧芬、蔡少森、顏明秀等，原來都嚟過立法會好多次，史顏景蓮好似仲熟路過啲職員咁滯。
東華三院主席何超蕸就話，自己公司同立法會好近，所以不時都會經過，加上東華喺添馬公園有間社企餐廳iBakery，佢哋平時有約都會揀喺呢度進行，幫襯番自己人。
同場仲有樂善堂主席梁紹安、副主席施家殷、東華副主席王賢誌及總理李曠怡同廖偉麟、仲有仁濟主席林煒珊及副主席嚴徐玉珊等，佢哋原本想喺議員平日接受訪問嘅「咪兜」位合照留念，但經職員提醒，先知嗰度只係畀議員專用，唔可以用嚟攞景影相，大家惟有乖乖哋揀其他位置影過，一樣咁靚。
卓妮