教育局局長吳克儉（吳得掂）有幾唔掂已經唔係新聞，社會普遍認為佢已經去到回歸來嘅低點，原來低處未算低，愈來愈多人認為，吳得掂應該攞零分，喺呢個咁撕裂嘅社會，原來仲可以凝聚到共識嘅，吳得掂真係創先河。教協嘅調查發現，前年同去年都有約一半受訪教師認為吳得掂值零分，至今年就有足足六成半人認為佢只值零分，真係唔知講咩好喇。
教育界立法會議員葉建源話教師最關注嘅新聞係全港性系統評估（TSA），而吳得掂就話要去日本睇紅葉而缺席相關公聽會。
佢話，三分二老師認為吳得掂一無是處，即使以一百分為滿分，吳得掂平均分亦只有十一點二分，如果小朋友只有咁低分，都唔知點同家長交代，批評佢冇心冇力，唔知發生緊咩事，又唔知自己做緊乜，其實只要肯做少少嘢，相信都會高分啲，點知一年比一年差。