近年被視為建制派「壞孩子」嘅自由黨，原來並非每個黨員都同建制派關係咁差嘅。剛當選灣仔渣甸山區議員嘅自由黨青年團副主席林偉文（Anson），星期二開完第一次區議會會議後，夜晚就同灣仔區議會前主席、民建聯（民記）孫啟昌，喺紀利華木球會擺咗六圍，正式上契成為父子。

Anson話，佢爸爸喺佢十幾歲嘅時候已經離世，無法見證佢多件人生大事，自覺少咗啲福分，一直都有啲遺憾。直到幾個月前識到孫啟昌，一開始只係貪玩咁叫對方做契爺，後來覺得相當投契，「好似同爸爸摸住酒杯底講心事咁」，兩人於是決定上契，唔知孫啟昌算唔算係「喜得麟兒」呢？

Anson又話，兩人有時都會因為政見不同而有爭執，但都會尊重同理解對方嘅睇法，而黨亦知道佢哋上契嘅事，仲一班兄弟去賀佢添，而多個建制派灣仔區議員亦有到賀，場面相當熱鬧。