政情：梁君彥闊佬 復會請食燒豬
尋日係立法會新年後第一次復會，內務委員會主席梁君彥（Andrew）忽然請議員及秘書處職員等食燒豬，話因為新一年開始，過往都有慣例，所以請大家食吓嘢喎。佢仲透露，兩隻燒豬每隻成三十斤重，使咗差唔多六千元，真係闊佬。早前有傳Andrew或密謀想做下屆立法會主席，唔知今次係咪燒豬打人牙骹軟，趁機會搞好關係，為做大會主席鋪路呢？
稱因簷篷傾斜幸避劫
Andrew就話，食燒豬嘅原因係因為立法會早前避過一劫，因為上月立法會大樓議員入口側門及兒童畫廊之間嘅地盤，有個簷篷傾斜，好彩當時冇人受傷。咁早前立法會門外有垃圾桶爆炸，幸好無人受傷，唔知又使唔使為此事食燒豬呢？
立法會秘書長陳維安被問到涉事簷篷同立法會連接中信大廈天橋工程嘅進展時話，上月簷篷事故對天橋工程有些少影響，但預計本月底會完工，立法會之後會增設路標指示及保安等設施，料需時三周，換言之天橋最快農曆新年後就可以啟用喇。