中環出更:民協老嫩兵 反轉區議會

多區區議會尋日舉行首次會議,除選舉正副主席,亦討論往後開會嘅議事規則。不過,未定規則前,民協屯門區議員甄紹南及其黨友江鳳儀尋日已聯手反轉區議會,作為新丁議員嘅甄紹南不但主動提出臨時動議,要求更改議事規則,更大膽「挑機」選主席。至於江鳳儀則屢提安定郵局關閉事件,被指離題,又錯將商務及經濟發展局局長蘇錦樑職位講成發展局局長。

甄紹南被寸亂提動議

甄紹南喺主席選舉中越級挑戰民建聯梁健文,最後只得八票落敗。佢隨後又喺商議議事規則時提出臨時動議,要求取消增補委員制度,但被同為議事新丁嘅新民黨甘文鋒反寸,指增補委員一事已喺上個議程討論,再次討論要等半年後,質疑甄提動議嘅時間唔適當。

江鳳儀就多次面紅耳赤咁提出要維持議會公義,又藉機會提到安定郵局關閉事件,批評政府未有諮詢區議會就作出行動,要求區議會去信譴責有關行為。不過,佢就錯將「去信商務及經濟發展局局長」講成「去信發展局局長」,又將「要求郵局重開」講成「譴責郵局重開」,真係老貓燒鬚。

卓妮

第一手消息請下載on.cc東網iPhone/iPad/Android/Windows Phone Apps