本報「正論」一語道破香港近年沉淪的主因：「一葉知秋，行政立法惡鬥不已，不僅拖慢工程等民生議題，而且阻礙香港整體發展，而這正是導致綜合競爭力每況愈下的主要原因。」
民生艱難，民怨由是而起。政府施政，卻最愛倒行逆施，好做唔做，不該管的卻愛管，像房屋問題，該諗計加建公屋，幫劏房戶上樓又唔切實去做，卻大搞「長者富貴屋」，長者既有幾百萬至千萬元身家，佢哋大把家人爭住照顧，使乜勞煩政府？呢個道理一字咁淺，政府搞「全城清潔運動」，又係有姿勢冇實際，搞清潔集中幾個黑點如油尖旺、深水埗，尤其啲橫街窄巷有食肆嘅地方就得喇，唔通要在有錢人豪宅聚居地如淺水灣、南灣、太平山的半山上敲鑼打鼓叫佢哋把垃圾裝入垃圾袋咩？
最近的「退休保障公眾諮詢」，尤其惹來社會各界劣評如潮，「好打得」嘅林鄭，一味靠嚇，話如採「不論貧富」方案，政府又要加稅，又會削弱競爭力……總之九百幾樣會拖垮香港；又批評周永新嘅全民退保方案「太感性」、「不熟悉公共財政運作」……林鄭「好打得」原來擅長「打橫行」，難怪有論者質疑佢：家陣公務員嘅退休長俸，一年開支成二百六十三億，可否「資產審查」？
呢個世界，高官退休可以更富貴，自己咬長糧就唔使「資產審查」，有啲退休公務員每月領取六萬至逾十萬長俸，而且佢哋通常都持有唔少物業添；家陣全民退保，老人家每月亦不過是三千二百多元，政府明明可以「迎難而上」搞全民退保，卻偏偏要假諮詢又廢噏連連，周永新教授心死，香港老人家更加絕望。「年與時馳，意與歲去，遂成枯落，多不接世。」一年將盡，想起「天堂冇位」，地上一骨灰龕難求，貧窮長者豈能不悲從中來！